“İqlim Fəaliyyəti üçün Gənclərin Bacarıqlarının Yaradılması: COP29-a gedən yol" adlı tədbir çərçivəsində Qoşulmama Hərəkatının Gənclər Təşkilatının Afrika, Mərkəzi Asiya, Karib və digər ölkələrdən olan nümayəndələri Milli Hidrometeorologiya Xidmətinin fəaliyyəti ilə əyani olaraq tanış olublar.

İlkin olaraq tədbir iştirakçılarına Hidrometeorologiya muzeyində yer alan ölkəmizin milli hidrometeorologiyasının tarixini əks etdirən eksponatlar, ölçü cihazları, avadanlıqlar, fotoşəkillər barəsində məlumat verilib.

Daha sonra Situasiya Mərkəzində qonaqlara hidrometeoroloji müşahidələrin təşkili, məlumatların qəbulu, emalı, vizuallaşması, o cümlədən əldə edilmiş məlumatlar əsasında hava proqnozunun hazırlanması prosesi izah olunub.

Xarici nümayəndələrə Erkən Xəbərdarlıq Sisteminin konsepsiyası barədə məlumat verilərək, onun insanların həyat və fəaliyyəti üçün yarada biləcək risklərin minimuma endirilməsində vacibliyi qeyd olunub.